எத்தனை கூர்மையானது
உனது மூளை!!
அத்தனை துல்லியமாய்
அனுப்புகிறது
புன்னகைக்க உதவும்
முகத்தின் தசைகளுக்கான
சமிக்ஞைகளை.
ஒரு பூ மலர்வது போல்
உதடுகளின் மையத்தில் தொடங்கி
அற்றம் வரை பயணிப்பது
உண்மையில் உதிக்கும் புன்னகை.
விளையாடும் பிள்ளையை
வீட்டுக்கு இழுப்பது போல்
இதழ்கள் இணையும் முனைகளை
இருபுறமும் இழுப்பது
வலிந்து நீ புரியும்
வெற்று நகை.
எத்தனை நுட்பமானது
எனது மனதும்!
புன்னகைகளின் வகைகளைக்
கண்டு அறிவிக்கிறது
விழித்திரைக்கு.
முகமூடியல்லாத
முகமூடியாக
இரண்டாவது ரகப் புன்னகையை
நீ அணிகிறாய்.
மனதால் நான்
பார்த்துக் கொண்டே இருக்கிறேன்.
No comments:
Post a Comment