வண்ணதாசம்

 

கான்கிரீட் காட்டினூடே

கருமை மினுங்கும் சாலையில்

குளிரும் மகிழுந்தின்

சன்னல்வழி காண்பதெல்லாம்

நெடுவானில் அல்ல அல்ல

நீலக் கண்ணாடிகளில்

மிதக்கும் முகில்கள்.

குறையில்லை,

எனக்குண்டு ஒரு பதுங்குகுழி.

பதுங்குகுழி அல்ல அல்ல

பேரன்பை முகிழ்த்தும்

பெருங்கவியின் முகநூலில்

எனக்குண்டு ஒரு

பிரியமான பல்லாங்குழி.

சோழிகள் அல்ல அல்ல

சின்னஞ்சிறு இதயங்கள்

என் உள்ளங்கைக்குள்.

ஒவ்வொரு கவிதைக்குமொரு

இதயச் சோழி.

விருப்பக்குறியின் மேல்

விரல் அழுத்திப் பிடிக்கையில்

"டிட்டிட்டிர்" என

உள்ளங்கைக்குள் சோழிகள் ஒன்றோடொன்று உரசும்

அல்ல அல்ல, அது

ஊர்க்குளத்தில் தவளைக்குஞ்சு

மழைக்குப் பேசும் சத்தம்.

விரலை நகர்த்தி

இதயத்தைச் சொடுக்குகையில் பல்லாங்குழிக்குள் கேட்கும் ஒரு "ப்ளக்"..

ப்ளக் வெறும் ப்ளக்

அல்ல அல்ல, அது

பிராஞ்சேரி அல்லிக்குளம்

பின்னாலேயே ஓடிவந்து

என்னுள் கல்லெறியும்

சத்தம்.

- காலைகளின் அழுத்தத்தை மாற்றி கவிதைகளால் அவற்றை நிறைக்கும் வண்ணதாசன் ஐயாவுக்கு அன்பு