07 April, 2010

நிழல் பற்றியவை


மின்தடைக்கு வேர்த்திருக்கிறது
மெழுகுவர்த்தி..
வாசலை அண்டி நிற்கும்
வன்மழை நனைத்த நாய்க்குட்டியைத்
துரத்தும் மனமில்லை எவர்க்கும்..
சற்றைக்கெல்லாம் தயக்கம் துறந்து
உட்சுவரெங்கும்
உலவத் தொடங்குகிறது
வால் குழைத்தபடி
மழையின் நிழல்.

***

ஊதியணைக்கப்படும்
சுடரின் நடனத்தில்
ஒரு கணம் உயிர்த்தசைந்து
உடன் மரிக்கிறது
உலோகப் பறவைச்சிலையொன்று.

***

வரைபடத்து நதிகளென
வளைந்தும் கிளைத்துமிருக்கிறது
இலையுதிர்ந்த மரமொன்றின்
இருளோவியம்..
வெயிலின் கரங்கள்
வெகு நேர்த்தியாய் வரைந்திருக்கும்
பாதி மட்டும் மட்டும் கட்டப்பட்ட
பறவையொன்றின் கூட்டில்
மரத்தடியில் நிற்கின்றன
வர்ணம் பூசப்பட்ட கோழிக்குஞ்சுகள்.

***
உயிர்ச்சத்து வேண்டி
கிடத்தப் பட்டிருக்கிறது குழந்தை
மரச்சட்டங்களின் எல்லை நுழையும்
மஞ்சள் வெயிலின் மடியில்...
சுவர் பற்றி மேலேறி
சூரியக்கற்றைகளை வழிமறித்து
சிசுவின் கன்னத்தில் படர்கிறது
சன்னலோரத்துச் சிறுகொடி.

***

இருசக்கர வாகனத்தை
இயக்கும் தோரணையில்
கைவிரல்கள் மடக்கி
வாயில் ஒலியெழுப்பி
கரையிலோடும் சிறுவனின்
கவனமீர்க்க முடியாமல்
மழைக்காலத்து ஏரியை
மௌனமாய்க் கடக்கிறது
விமானமொன்றின் நிழல்.

*
நன்றி : அகநாழிகை

16 comments:

  1. வாழ்த்துகள் மருத்துவரே

    சொற்களின் தசையில் மச்சமெழுதி பார்க்கும் படிமங்கள் ...

    தொடர்க

    ReplyDelete
  2. இதழிலேயே வாசித்தேன், ரொம்ப அருமையான கவிதைகள். நானும் இப்படி பலப்பல நிழல்களை கற்பனை செய்து பார்த்துக் கொண்டிருந்தேன் இதை வாசித்த பொழுது.

    ReplyDelete
  3. /இருசக்கர வாகனத்தை
    இயக்கும் தோரணையில்
    கைவிரல்கள் மடக்கி
    வாயில் ஒலியெழுப்பி
    கரையிலோடும் சிறுவனின்
    கவனமீர்க்க முடியாமல்
    மழைக்காலத்து ஏரியை
    மௌனமாய்க் கடக்கிறது
    விமானமொன்றின் நிழல். /

    அருமை

    ReplyDelete
  4. வாழ்த்துக‌ள் கௌரி

    ReplyDelete
  5. எல்லாமே நல்லா இருக்குது. குறிப்பா கடைசிக்கவிதை ரொம்ப நல்லா..

    @
    நேசமித்ரனின் மறுமொழிதலின் விளையாட்டு அழகு!

    ReplyDelete
  6. கவிதைகள் அத்தனையும் அருமை! வாழ்த்துக்கள் கெளரிப்ரியா!

    ReplyDelete
  7. தமிழர்கள் அனைவருக்கும் தமிழ் புத்தாண்டு வாழ்த்துக்கள்

    இந்த ஆண்டு உங்கள் வாழ்வில் எல்லையில்லா மகிழ்ச்சியும், நோயற்ற வாழ்வும், குறைவற்ற செல்வமும், நீண்ட ஆயுளும் மற்றும் அனைத்து நலங்களும், வளங்களும் பெற்று வாழ வாழ்த்துகிறோம்.

    அன்புடன்
    www.bogy.in

    ReplyDelete
  8. வாழ்த்துக‌ள் கௌரி.. :-))

    ReplyDelete
  9. அனைத்தும் அழகு ப்ரியா..

    ReplyDelete
  10. கவிதைகள் மிகவும் அருமையாக இருக்கிறது
    ...வாழ்த்துக்கள்...

    ReplyDelete
  11. beautiful.. each one of them. :)

    ReplyDelete
  12. அனைவருக்கும் மிக்க நன்றி

    ReplyDelete