08 February, 2019

மாவடுக்காலம்

பட்டுப்பூச்சி போல் பாவித்து 
புறங்கையில் இமை உரசிப்
புன்னகைக்கும் மாயாவைப் போல்
மாடிச்சுவர் உரசி நிற்கிறதிந்த
பசுமஞ்சள் மாமஞ்சரி.

தாழ்ந்த கிளையொன்றின் மாவடுவைத்
தாவிப் பறிக்கும் மாயா,
உள்ளங்கைக்குள்  உய்விக்கிறாள்
ஒரு நெடுங்கோடையின்  காதையை.

ஆடிக்களித்த பெருவெளி
அந்நியமாகும் தினத்தை..
விளைநிலம் விட்டொழிந்து
வேறெங்கோ வீழ்தலை..
உப்பு நீரில் ஊறியூறி
உலர்ந்து கிடத்தலை..
சுவை மொட்டுகள் முன்மொழியும் மதிப்பீடுகளை..
ஒப்பனைச் சொற்கள் பூண்ட
ஒப்பீட்டுச் சந்தைகள்
ஒவ்வாது புழுங்குமொரு பொழுதை என
மயிற்பீலிகள் பிரசவிக்கும்
மாயாவின் பேழைக்குள்
கனவிலும் மாவடு காண்பதற்கில்லை
கனலும் பாலைப் பொழுதுகளை.

பருவங்களை உறைவிக்கும்
திறனற்றதொரு வேனிற் கனவில்
மாவடு ஆகிறாள் மாயா,
மாயாவாகிறேன் நான்.

சிறு மனம்





நிறைய நிறையக்
குறையும்
நிறைதலைப் பறையும்
ஒலி.


..


அம்மாவும் அப்பாவும் 
அருகிலற்ற பொழுதுகள் 
அத்துணை தனிமையில்லை 
இந்நாட்களில்!

பெருநகரத்தின் உயிரற்ற
சனிக்கிழமை யொன்றில்
பாண்டி விளையாடப்
பழகிவிட்டாள் இனியா,
அடுக்ககத்துச் சுவர்களின்
அடுத்தடுத்த செவ்வகங்களில்
அலைந்து கிடக்கும்
பகல் நிலவுடன்!

பிறழும் பிறைகள்




உறங்கா நிசிகளின் 
இருள் கொஞ்சம்..
கொதித்து வற்றிக்
கருகியதன் மிச்சம்..
உரைத்து உணராத 
உன்மத்தம்...
யாவற்றின் கருமையையும்
தீண்டித் தீற்றும் காலம்.

தூரிகை உலர்கையி லெஞ்சும்
புரைவிழியின் கீழ் கருவளையம்.
மேலும் கீழுமாய்
நிறம் பிறழும் பிறை.

இனியவை எண்ணில 2



சப்பாத்தி மாவின் ஒரு விள்ளலை
உருட்டித் தேய்த்தபடியும்
குளியல் துண்டைச் சேலையாய் உடுத்தி
ஆசிரியை போல் கதைத்தபடியும்
பெரியவர்களின் உலகினுள்
புகுந்து திரிகிறாள் இனியா..

நீலச் சிறகும்
செம்மஞ்சள் அலகுமாய்
மிதந்து செல்கிறதொரு
பறவைக்குஞ்சு,
இத்துணை பெரிய வானில்
தானே வானாய்.

நீலம்


நீச்சல் குளத்தின் தரைக்கு 
வேறெந்நிறமும் ஒவ்வாதெனினும்
இணக்கமில்லை 
இந்நீலத்துடன்..

குடுவைப்பூ...
குவளை மீன்...
குயவனின் வனைதலுக்கொப்ப
குறுகிக் கிளைக்கும்
உப்பரிகைச் செடி...
போலவே திணறுமிந்த  நீலம்.

மகவீன்று ஒற்றை அறைக்குள்
மனம்பிறழ்ந்தவளின்
கவிச்சொற்களென
நில்லாது நெளியும்
நீச்சல் குளத்தின் தரையிற் புதைந்த
சின்னஞ்சிறு சதுரங்கள்..

மென்மெல்லிய இருதயங்கொண்ட
கவியொருவனின்
மௌனம் நீலம்..

நீலம் மௌனம்
நீலம் ஆழம்
நீலம் அண்டம்..
ஒடுங்கிய வெளியெதற்கும்
உகந்ததல்ல நீலம்.


நீலம் பறவை
நீலம் பரவை..
நீலம் வகுப்பதற்கில்லை
நீலம் வனைவதற்கில்லை
நீலப் பூச்செதற்கும்
நீலத்தின் அழகில்லை.

கதை



இறந்துபட்ட தட்டானின்
சிறகில் ஊடுருவும்
முன்னிரவின் நிலவொளி..

மருத்துவனின் நினைவிலோ
செவிப்பறையின்  ஒளிக்கூம்பு!

இனி
இரவெங்கும் நெய்வதற்குண்டு
ஒலியின் கதை..
ஒளியின் கதை..
வாழ்வின் கதை.

பூட்டிய கதவுகள்

உட்புறம் பூட்டிய 
கதவுகளின் முன் 
வெகுளாதீர்..
மறுகாதீர்..
சபிக்காதீர்... 
கதவின் பின்னிருப்பவர்க்குக் கிட்டும்
ஆகப்பெரிய ஆசுவாசம்
பூட்டிக்கொள்வதாய் மட்டுமே 

இருக்கக்கூடும்.